1. Introduzzjoni

 

Din il‑lezzjoni bdejtha billi staqsejt lit‑tfal x’kienu l‑aħħar ftit topiks li għamilna. Weġbuni billi qaluli li tkellimna dwar il‑lokalità tagħna ta’ Ħaż‑Żebbuġ billi morna Fieldwork madwar l‑iskola u kklassifikajna l‑affarijiet is‑sbieħ li rajna u dawk il‑koroh; u wkoll rajna x’għandna nagħmlu biex inħarsu s‑sabiħ li rajna u ntejbu l‑ikrah.

Spjegajtilhom li se nkomplu nitkellmu fuq dan is‑suġġett u li issa ħa naraw x’nistgħu nagħmlu biex nibżgħu iktar għall‑ambjent tagħna.

Staqsejt lit‑tfal jaħsbu ftit fuq x’għandna nagħmlu biex inħarsu l‑ambjent u d‑Dinja tagħna. It‑tfal tawni xi ideat u jien niżżilthom fuq il‑bord interattiv. Filwaqt li għidtilhom li dawk l‑affarijiet li qaluli huma kollha tajbin, f’din il‑lezzjoni se niffukaw u nitkellmu fuq waħda biss: L‑ilma – għalfejn hu importanti u kif nistgħu nibżgħu għalih.

  

2. Il‑qafas tal‑lezzjoni

  

a. Informazzjoni ġenerali fuq l‑ilma

Tajthom spjega ta’ fuq fuq dwar l‑ilma: id‑Dinja hi magħmula l‑iktar mill‑ilma, iżda huwa kollu tajjeb għalina biex nużawh? It‑tfal weġbuni li le għax ħafna minnu hu ilma baħar. Spjegajt ukoll li anki ġisimna, ħafna minnu hu magħmul mill‑ilma, għalhekk ħriġt l‑importanza tal‑ilma għalina lkoll u għal kull kreatura ħajja.

 

b. X’jiġri minna u minn kull ħlejqa oħra mingħajr ilma?

It‑tfal ġegħelthom jimmaġinaw il‑konsegwenzi li kull wieħed u waħda minna naffaċċjaw jekk nispiċċaw mingħajr ilma; anki l‑ħxejjex u l‑annimali, u mingħajr dawn nispiċċaw lanqas ikel ma jkollna.

 

ċ. L‑ilma ġej mix‑xita – Kulħadd komdu bħalna?

Komplejt il‑lezzjoni billi staqsejt lit‑tfal minn fejn jiġi l‑ilma u dawn weġbuni mix‑xita. B’dan il‑punt ħriġt l‑importanza tax‑xita, għax dak l‑ilma jintuża għal ħafna affarijiet. Komplejt billi għidt lit‑tfal li aħna nsibu kollox lest u f’dan il‑każ kulma għandna nagħmlu huwa niftħu l‑vit biex ikollna l‑ilma, iżda hawn min irid jimxi ħafna biex iġib ftit ilma biex jixrob u ħafna drabi ma jkunx nadif. Għalhekk għandna nkunu grati!

 

d.In‑nuqqas tax‑xita – nibżgħu għall‑ilma!

Avolja nistgħu nsibu l‑ilma xħin irridu, f’Malta għandna problema li xita ma tantx tagħmel u m’għandniex muntanji u xmajjar, għalhekk l‑ilma huwa skars. B’hekk il‑ftit ilma li jkollna għandna nibżgħu għalih.

X’għandna nagħmlu biex nibżgħu għall‑ilma? Staqsejt lit‑tfal din il‑mistoqsija u dawn ħarġu b’ħafna ideat li jistgħu jagħmlu huma stess kemm id‑dar kif ukoll l‑iskola. Dawn tniżżlu fuq il‑bord interattiv biex it‑tfal ikunu jistgħu jarawhom sew.

Vidjow: Wara ntwera vidjow fuq kif għandna nibżgħu għall-ilma biex ikompli jżid ma’ dak li qalu t-tfal u jifhmu aħjar.

 

e. Storja

Qrajtilhom storja dwar tifel li nesa l‑vit tal‑iskola miftuħ u b’hekk mhux talli ħela ħafna ilma imma ħoloq problemi oħrajn. Iddiskutejna l‑istorja flimkien u tkellimna fuq x’se jagħmlu huma mil‑lum ’il quddiem biex jevitaw li jiġri xi ħaġa bħal dan.

  

3. Għeluq

  

a. Ir‑Reverse Osmosis

 

Lit‑tfal semmejtilhom li peress li aħna gżira u li mdawrin bil‑baħar, għandna makkinarju f’Malta li nsejħulu Reverse Osmosis li jippurifika l‑ilma baħar biex inkunu nistgħu nużawh. Komplejt billi għidtilhom li l‑ilma xorta għandna nibżgħu għalih.

 

b. Għanja – Idejja dejjem nodfa

Semmajtilhom din l‑għanja biex nagħlqu l‑lezzjoni qabel nibdew naħdmu xi eżerċizzji.

 

ċ. Il‑logħba interattiva

Qabbadt xi tfal joħorġu jilagħbu l‑logħba fuq il‑bord interattiv li għandha x’taqsam mal‑lezzjoni.

 

d.Xogħol fil‑klassi u għad‑dar

Fl‑aħħar qassamtilhom il‑werkxit u qrajnieha. Tajthom spjega żgħira u ħdimna ftit minnha l‑iskola. It‑tfal ħadmu l‑kumplament id‑dar.

 

e. Fl‑aħħar staqsejt lit‑tfal x’tgħallmu llum u kif se jużawh.